Лейлекте курулуш материалдарын чыгарган муниципалдык ишкана ишке кирди

Баткен облусуна караштуу Лейлек районунда курулуш материалдарын чыгарган муниципалдык ишкана ишке кирди. Бул тууралуу президенттин Баткен облусундагы өкүлчүлүгүнөн билдиришти.

Маалымдалгандай, мамлекет тарабынан Баткен обласун өнүктүрүүгө багытталган 500 миллион сомдун алкагында 5 миллион сом бөлүнүп Ак-Суу айыл аймагынын Жеңиш айылында курулуш материалдардын иштеп чыгаруучу муниципалдык ишкана курулду.

"Ишкананы курууга Ак-Суу айыл өкмөтү тарабынан да 2 миллион 400 миң сом өздүк салым катары жумшалган.

Учурда керектүү бардык жабдуулар орнотулуп, ишкана алгачкы продукцияларын чыгарууда.

Пескоблок, таман таш (брусчатка), шакектер (кольцо), суу ноолору, электр мамычаларынын үлгүлөрү чыгарылып жатат", - деп айтылат маалыматта.

Ал эми Ак-Суу дарыясынын жээгинде жайгашкан ишканада сырье маселеси жок, дарыядан эң жогорку сапаттагы кум шагылдар иштетилет.

Белгилей кетсек, муниципалдык ишканада 8 жумушчу оруну түзүлдү.

Ишкананы ачуунун негизги максаты айыл аймактын дотациядан чыгуусуна шарт түзүү болуп саналат.

Автор: Айзада Кыдырмышева