Баткенде эң чоң ирригациялык долбоор ишке ашырылууда

Мамлекеттик курулуш агенттигинин директору Нурдан Орунтаев Баткен облусуна болгон иш сапарында Кадамжай районундагы "Алгакадам" коомдук бирикмеси менен жолугуп, долбоордун ишмердүүлүгү менен таанышты. Бул тууралуу бүгүн, 30-ноябрда аталган мекемеден билдиришти.

Маалымдалгандай, “Алгакадам" 2022-жылы долбоору мамлекет жана жергиликтүүлөр ортосунда түзүлгөн инновациялык коом. Анын максаты Кадамжай районунун Кара-Жантак массивинде жайгашкан айыл чарба өндүрүшүнө жараксыз, дын жаткан тоо тектеш жерлерди агын суу менен камсыздоо.

"Долбоордун алкагында узундугу 25 чакырым болгон каналдын курулушу, анын ичинде жалпы узундугу 6535м болгон 3 тоннель куруу каралып, курулушка зарыл болгон 2 экскватор, 2 бетон аралашмасын жеткирүүчү атайын техника, 1 оор техникаларды жеткирүүчү трайлер, 1 асма кран, эн оор болгон тоннелдерди казуу бөлүгүнө шахта куруучу атайын техникалар алынган",-деп айтылат маалыматта.

Долбоор ишке ашса 4200 гектар жер өздөштүрүлүп, сугат суу менен камсыздалат жана 7600 дөй кожолук бул суудан пайдалана алат.

Белгилей кетсек, канал куруу долбоорун аяктоо 2024-жылдын декабрь айына пландалган.

Автор: Айзада Кыдырмышева