Баткен жана Ош окуяларында жабыркагандарга жөлөк пул жогорулатылды

Баткен жана Ош окуяларында жабыркагандарга жөлөк пул жогорулатылды. Бул тууралуу бүгүн, 30-ноябрда Эмгек министрлигинен билдиришти.

Маалыматка ылайык, министрлер кабинетинин токтому менен ушул жылдын 1-августунан тартып 2021-жылдын апрелинде Баткен облусунда болуп өткөн окуялардын натыйжасында жабыр тарткандарга ай сайын төлөнүүчү социалдык жөлөк пул жогорулатылды.

Жөлөк пулдун өлчөмү 3 миң 700 сомдон 5 миң 500 сомго көбөйтүлдү.

"Ошондой эле 2022-жылдын сентябрында Баткен жана Ош облустарында болуп өткөн окуялардын натыйжасында жабыр тарткандарга дагы ай сайын төлөнүүчү социалдык жөлөк пул каралып, анын өлчөмү 5500 сомду түздү", - деп айтылат маалыматта.

Ар айлык кошумча социалдык жөлөк пул төмөнкүлөргө дайындалат:

- курман болгон адамдардын балдарына - алар он сегиз жаш куракка толгонго чейин;

- курман болгон адамдардын ата-энелерине (атасына, энесине) - алар пенсия курагына жеткенде, эгерде курман болгон адам жалгыз баласы болгон учурда;

- майыптыгы бар адамдар деп таанылган жабыр тарткандарга - майыптыгы белгиленген датадан тартып медициналык-социалдык эксперттик комиссиянын корутундусун колдонуу мөөнөтү аяктаганга чейин.

Автор: Айзада Кыдырмышева