Ысык-Көлдө Кызыл-Кыя-Башарын жайлоосуна бара жаткан туристтер бороондо калды (видео)

Ысык-Көлдө жайлоого бара жаткан туристтердин унаасы кар күрткүгө тыгылып, куткаруучулар жардамга барышты. Бул тууралуу Өзгөчө кырдаалдар министрлиги билдирди.

Билдирүүгө ылайык, Ысык-Көл облусунун Ак-Суу районунун Кызыл-Кыя-Башарын жайлоосуна бара жаткан Nissan Patro үлгүсүндөгү унаа кар күрткүгө тыгылып, өз алдынча чыга албай калган.

Унаада 5 адамдан турган бир үй-бүлөнүн мүчөлөрү Казакстандын жарандары болгон. Алар "Каракол" лыжа базасына эс алуу үчүн келишкен.

Жерине ыкчам түрдө ӨКМнын 4 куткаруучусу, Ак-Суу райондук Өзгөчө кырдаалдар бөлүмүнөн 2 куткаруучусу тартылып, кар күрткүдө калган үй-бүлөнү унаасы менен сүйрөп чыгарып беришкен.

Учурда туристтердин абалы канааттандырарлык. Аба ырайы турукташканча Каракол шаарында калышкан.