Токтогулда издөөгө алынган жаран Казакстанга өтүп баратканда кармалды

Токтогулда уурулукка шектелип, изин жашырып жүргөн жаран кармалды. Бул тууралуу бүгүн, 12-декабрда Жалал-Абад облустук милициясынан билдирди.

Маалыматка ылайык, Кылмыш-жаза кодексинин 205-беренеси (Уурдоо) менен катталган кылмыш ишине шектүү катары 49 жаштагы С.У. аттуу жаранга 19-октябрда издөө жарыяланган.

9-декабрда Чүй облусунда жайгашкан кыргыз-казак “Ак-Жол” өткөрүү постунан Токтогул РИИБдин кылмыш иликтөө бөлүмүнүн кызматкерлери тарабынан Нарын облусунун Жумгал районунун тургуну 1974-жылы туулган С.У. кармалып, убактылуу кармоочу жайга киргизилди.

Ал Токтогул районунда жайгашкан тез татым тамактануучу жайына түн ичинде уурулукка кирип, тиричилик техникаларын уурдап кеткен.

Учурда тергөө амалдары жүрүп жатат.

Автор: Бек Оморбеков
Фото: Жалал-Абад ОИИБ