Бишкек мэриясы шаардыктарды мактады

Бишкектеги "Ала-Тоо" аянтынан Жаңы жыл майрамына карата өткөрүлгөн иш-чарадан кийин 4 тонна таштанды чыгарылды. Бул тууралуу бүгүн, 1-январда калаа мэриясынан кабарлады.

Маалыматка ылайык, "Тазалык" муниципалдык ишканасынын 6 атайын техникасы менен 60 кызматкери иш алпарган.

"Өткөн жылдагы Жаңы жыл майрамына салыштырмалуу бул жолу аянтта киши көп болду. Тактап айтканда, кишинин саны 15 миңдин айланасында чогулган жана 1 тоннага аз таштанды чыккан. "Ала-Тоо" аянтынан аз таштанды чыгарылып жатканы Кыргызстандын борборунда массалык иш-чараларды өткөрүү маданиятынын жогорулаганынан кабар берет. Бишкектин тургундары коомдук жайларда өз шаарына кылдат мамиле жасап, тазалыкты көрсөтө башташты", - деп айтылат билдирүүдө.

Ошондой эле "Тазалык" ишканасы тазалыкты сактоого салымын кошкон, маданияттуулуктун үлгүсүн көрсөткөн шаар тургундарына жана конокторуна ыраазычылык билдирди.

Автор: Бек Оморбеков