Чүй облустук милициясы Жогорку Кеңеш кабыл алган желекти көтөрдү

Чүй облусунун ички иштер башкы башкармалыгынын имаратынын алдына Жогорку Кеңеш кабыл алган желекти илди. Бул тууралуу ОИИББнын басма сөз кызматынан билдирди.

Маалыматка ылайык, мамлекеттик тууну көтөрүү иш-чарасы кечээ, 3-январда өтүп, ага облустук милициянын жетекчиси Дамирбек Исаков орун басарлары менен катышты. Анда жетекчи кызматкерлерди жаңы жылы жана жаңы желек менен куттуктаган.

Белгилей кетсек, Бишкектин “Ала-Тоо” аянтына жаңыланган туу 1-январда илинген. Ал Жогорку Кеңеш кабыл алган туудан бир топ айырмаланып турарын айтышып, нааразычылыгын билдиргендер чыккан.

Мамлекеттик тууну өзгөртүү тууралуу мыйзам расмий түрдө 2023-жылдын 26-декабрынан тарта күчүнө кирген.

Автор: Арууке Амирдинова