Токмокто сойкукана аныкталып, үч жаран кармалды

Чүйдө интимдик кызмат көрсөтүп жүргөн 2 кыз жана администратор кармалды. Бул тууралуу бүгүн, 8-январда облустук милициядан билдирди.

Маалыматка ылайык, 28-декабрда милиция Токмок шаарындагы батирлердин биринде интимдик кызмат көрсөтүп келген 1991 жана 2001-жылы туулган 2 кызды аныкташкан.

Бул факты боюнча Кылмыш-жаза кодексинин 160-беренесине (Сойкулукка жана ыпластыкка көмөктөшүү) ылайык кылмыш иши козголгон.

Мындан тышкары кызмат көрсөткөн жайдын администратору 1984-жылы туулган А.Г. аныкталып, андан далил катары акча жана буюмдар алынган.

"Иликтөө иштеринин жүрүшүндө А.Г. кармалып, убактылуу кармоочу жайга киргизилди. Ал эми 2 кыздын аракетине тергөөнүн жүрүшү менен юридикалык баа берилет", - деп айтылат билдирүүдө.

Учурда тергөө иштери жүрүп жатканы кошумчаланды.

Автор: Кылымбек Бейшеев
Фото: Чүй ОИИБ