"Өлтүрөбүз дешкен". Аксыда 80 миң сом талап кылган шектүү кармалды

Аксыда опузалап акча талап кылууга шектелген жаран кармалды. Бул тууралуу бүгүн, 16-январда Жалал-Абад ОИИБнен билдиришти.

Маалыматка ылайык, 10-январда райондук милицияга 24 жаштагы тургун арыз менен кайрылган. Ал ошол эле күнү саат 00:10 чамасында унаада отурган жерине тааныш балдар келишкенин айтып, А.З. 80 миң сом талап кылып, айтылган акчаны бербесең өлтүрөбүз дегенин билдирген.

Бул факты боюнча Кылмыш-жаза кодексинин 208-беренесине (Опузалап талап кылуу) ылайык кылмыш иши козголгон.

"Шектүү катары Кашка-Суу айыл аймагынын тургуну 1994-жылы туулган А.З. ошол эле күнү кармалып, убактылуу кармоочу жайга киргизилген жана чөнтөгүнөн жабырлануучуга таандык болгон 11 миң сом акча табылган", - деп айтылат маалыматта.

Учурда тергөө амалдары жүрүүдө.

Автор: Кылымбек Бейшеев
Фото: Жалал-Абад ОИИБ