Токтогулдун тургунун сабоого шектелип 2 жаран кармалды

Токтогулда ден соолукка оор залал келтирген деген шек менен 2 жаран кармалды. Бул тууралуу бүгүн, 23-январда Жалал-Абад ОИИБинен кабарлады.

Маалыматка ылайык, 15-январда милицияга 43 жаштагы Токтогул районунун тургуну арыз менен кайрылган. Ал былтыр 3-ноябрда саат 18:00 чамасында бейтааныш адамдар сабап кеткендигин жана денесинен оор жаракат алгандыгын айткан.

Бул факты боюнча Кылмыш-жаза кодексинин 130-беренесине (Ден соолукка оор залал келтирүү) ылайык кылмыш иши козголгон.

Арыз ээси буга чейин ооруканада дарыланып чыккандыктан, ага карата дайындалган соттук-медициналык экспертиза токтому, бейтап баяны менен бирге соттук-медициналык экспертиза кызматына жөнөтүлгөн.

Шектүү катары Токтогул районунун тургундары 42 жаштагы К.А. жана 31 жаштагы Т.Б. кармалып, убактылуу кармоочу жайга киргизилди.

Учурда тергөө амалдары жүргүзүлүүдө.

Автор: Кылымбек Бейшеев
Фото: Жалал-Абад ОИИБ