Бишкекте ЖЭБден чыккан өрт толугу менен өчүрүлдү

Бишкекте ЖЭБден чыккан өрт саат 05:05 чамасында толугу менен өчүрүлдү. Бул тууралуу Өзгөчө кырдаалдар министрлигинен билдиришти.

Маалымдалгандай, Шабдан Баатыр №108 дарегинде жайгашкан ЖЭБдин аймагында кырсык болгондугу тууралуу маалымат түшкөн. Жерине 2-февралга караган түнү саат 03:06 чамасында Свердлов райондук №3 ӨКБдан 2 бөлүм, Октябрь райондук №7 ӨКБдан 1 бөлүм, Октябрь райондук №5 ӨКБдан 1 бөлүм, Биринчи Май райондук №8 АӨКБдан 1 бөлүм, Биринчи Май райондук №4 ӨКБдан 1 бөлүм, жалпы 6 бөлүм жана штаб тартылган. Саат 3:15ке карата 4 бөлүм артка кайтарылган. Ал эми жеринде 2 бөлүм жана штаб иш алып барды.

Ага ылайык, өрт саат 04:55те чектөөгө алынып, саат 05:05те толук өчүрүлдү. Жеринде Өзгөчө кырдаалдар министри Бообек Ажикеев координациялык иш-чараларын жүргүзүүдө. Кырсыктын кесепетинен ТЭЦтин 3 кызматкери жабыркап тез жардам кызматы аркылуу шаардык ооруканага жеткирилди.

Учурда жеринде авариялык абалдын кесепеттерин тез арада жоюу үчүн ыкчам топ түзүлүп иш алып барууда. Кошумча маалымат берилет.

Автор: Айзада Кыдырмышева