Жалал-Абадда 20 жашар кызга өз үйүндө кол салып, телефонун тартып алууга шектүү жаран кармалды

Жалал-Абад шаарында тоноого шектелген жаран кармалды. Бул тууралуу бүгүн, 9-февралда облустук милициядан билдирди.

Маалыматка караганда, 6-февралда саат 13:30 чамасында Жалал-Абад шаарындагы үйлөрдүн биринин дарбазасынан белгисиз жигит ашып өтүп, 20 жаштагы кызды уруп, анын iPhone 12 Pro үлгүсүндөгү телефонун тартып алган.

Бул факты боюнча Кылмыш-жаза кодексинин 206-беренесине (Тоноо) ылайык кылмыш иши козголгон.

Шектүү катары Ноокен районунун тургуну 1992-жылы туулган М.А. кармалып, убактылуу кармоочу жайга киргизилди.

Анын 2013-жылы Базар-Коргон райондук соту тарабынан "Тоноо" беренеси менен 7 жылга соттолгондугу маалым болду.

Учурда тергөө амалдары уланууда.

Автор: Кылымбек Бейшеев
Фото: Жалал-Абад ОИИБ