Кыргызстанга контрабандалык жол менен алынып келген Cadillac Escalade үлгүсүндөгү унаа аныкталды

Мамлекеттик бажы кызматынын Контрабандага каршы күрөшүү боюнча башкы башкармалыгынын кызматкерлери унааны мыйзамсыз алып кирүү фактысын аныкташты. Бул тууралуу бажы кызматынын басма сөз кызматы билдирди.

Текшерүү иш-чараларынын жүрүшүндө, 2007-жылы чыгарылган Cadillac Escalade үлгүсүндөгү унаа аныкталган. Анын ээси Армениянын жасалма мамлекеттик номурларын мыйзамсыз колдонуп, Кыргызстандын аймагында бажы жактан жол-жоболоштурбастан жана бажы төлөмдөрүн төлөбөстөн жүргөн.

Мындан улам мамлекеттик бюджетке келтирилген зыяндын суммасы 2 миллион 965 миң сомду түздү.

Факт катталып, чогултулган материалдар процессуалдык чечим кабыл алуу үчүн Башкы прокуратурга өткөрүлүп берилди.

Автор: Азат Бейшенбеков