Румыния атактуу Олимпиада чемпионун Бухарестке киргизбей койду

Румыниянын бажы кызматы эркин күрөш боюнча эки жолку Олимпиада чемпиону Абдулрашид Садулаевди өлкөгө киргизбей койду. Мындан улам ал Бухарестте өтүп жаткан Европа чемпиондугуна катыша албай турганын Орусиянын Күрөш федерациясынын президенти Михаил Мамиашвили билдирди.

"Садулаевди Бухаресттин аэропортуна киргизбей коюшкан. Биз Европа чемпионатынын уюштуруу комитетине кайрылдык, бирок алар бажы кызматынын алдында алсыз экен. Садулаевди киргизбөөнү чечкен офицерлердин айтымында, алар балбандын визасынан күмөн санашкан. Бирок бул чечимде кичине кызыкчылык бар. Бул виза менен Румынияга келгенге чейин Садулаев Шенген аймагында, тагыраагы Испанияда болгон, ал жерден Бухарестке учкан. Испанияда ага эч кандай суроо болгон эмес", - деген Мамиашвили.

Румыниянын борборунда 12-18-февраль аралыгында күрөш боюнча Европа чемпионаты өтүп жатат, бүгүн, 16-февралда эркин күрөш боюнча мелдештер башталат.

27 жаштагы Садулаев Рио-де-Жанейро менен Токиодо өткөн Олимпиада оюндарынын жеңүүчүсү. Ал ошондой эле Европанын төрт, Дүйнөнүн беш жолку чемпиону.

Автор: Азат Бейшенбеков