Бишкектин №67 мектебинде окуучулардын биринен кургак учук аныкталды

Бишкектеги №67 мектеп-гимназиясындагы окуучудан кургак учук аныкталып, мекеме убактылуу онлайн окууга өткөн. Бул тууралуу бүгүн, 13-мартта шаардык мэриянын маалымат кызматынан билдиришти.

Маалыматтарга караганда, окуучудан дарт аныкталгандыгы 7-мартта белгилүү болгон. Мындан улам ал бала окуган класстын ата-энелери менен дарыгерлер чогулуш өткөрүп, мектеп эки күнгө, тагыраагы 11-12-мартка онлайн окууга өткөн.

Мектеп толугу менен Мамлекеттик санитардык-эпидемиологиялык көзөмөлдөө борборунун адистери тарабынан дезинфекцияланды. Ооруп калган окуучу менен байланышта болгон бардык окуучулар жана мугалимдер рентгенден өтөрү кошумчаланды.

Автор: Арууке Амирдинова