Токтогулда мал уурдоого шектелген жарандын үйүнөн 2 мылтык табылды

Токтогулда мал уурдоого шектелген жарандын үйүнөн 2 ок атуучу курал табылды. Бул тууралуу Жалал-Абад ОИИБинин басма сөз кызматы билдирди.

Маалыматка ылайык, 10-мартта милицияга 48 жаштагы жаран арыз менен кайрылган. Ал 8-мартта короосунан 3 кой уурдалганын айткан. Натыйжада арыз ээсине 45 миң сомдук материалдык зыян келтирилген.

Бул факты боюнча Кылмыш-жаза кодексинин 205-беренесине (Мал уурдоо) ылайык кылмыш иши козголгон.

Шектүү катары Токтогул районунун тургуну 2000-жылы туулган М.С. кармалып, убактылуу кармоочу жайга киргизилген.

Кармалган жарандын үйүнө тинтүү жүргүзүү учурунда 2 даана ок атуучу курал табылып, тиешелүү экспертизалар дайындалган. Ал эми 12-мартта анын баш коргоо чарасы Токтогул райондук сотунда каралып, үй камагына чыгарылган.

Учурда тергөө амалдары жүрүүдө.

Автор: Кылымбек Бейшеев
Фото: Жалал-Абад ОИИБ