Ысык-Көлдө мыйзамсыз менчиктештирилген 21 гектар жер мамлекетке кайтарылды

Тоң районунда мыйзамсыз менчиктештирилген 21 гектар жер тилкеси мамлекетке кайтарылды. Бул тууралуу бүгүн, 15-мартта Башкы прокуратурадан билдирди.

Маалым болгондой, Тоӊ райондук администрациясынын 1998-жылдагы токтому менен убактылуу пайдаланууга берилген жер тилкенин укук аныктоочу иш-кагаздары Ч.К. аттуу жаран тарабынан жасалмаланып 21 гектар аянттагы жайыт категориясындагы жер тилке жеке менчикке чыгарылганы аныкталган.

Ага ылайык, райондук прокуратура тарабынан аталган жер тилкенин укук аныктоочу иш-кагаздарын жокко чыгаруу боюнча сотко келтирилген доо арыздар толугу менен канааттандырылып, прокурордук чара көрүү актысы түзүлгөн.

Жыйынтыгында 40 миллион 950 миң сомду түзгөн 21 гектар жайыт жер мамлекеттин менчигине кайтарылган.

Автор: Кылымбек Бейшеев
Фото: Башкы прокуратура