Кара-Сууда түн жамынып уурулук кылган шектүү кармалды. Ал 7 үйгө кирген

Кара-Сууда түн жамынып үйлөргө уурулукка кирип жүргөн шектүү кармалды. Бул тууралуу бүгүн, 27-мартта Ош ОИИБинен билдирди.

Маалыматка ылайык, 7-январда милицияга 1982-жылы туулган Г.М. аттуу жаран арыз менен кайрылган. Ал 2023-жылы 4-декабрга караган түнү өзү жашаган үйгө белгисиз бирөө кирип, сумкасынын ичинен 45 миң сомун уурдап кеткендигин айткан.

Бул факты боюнча Кылмыш-жаза кодексинин 205-беренесине (Уурдоо) ылайык кылмыш иши козголгон.

Шектүү катары Ноокат районунун 2002-жылы туулган Ж.Э. аттуу тургуну кармалган.

Ошондой эле тергөөдө ал башка дагы 7 үйгө кирип, акча, сыналгы, уюлдук телефондорду, ноутбуктарды уурдаганы аныкталган.

Жарандарга келтирилген зыяндын болжолдуу суммасы 500 миң сомго чукул сумманы түзөт.

Учурда жабырлануучуларга келтирилген зыяндын орду толтурулуп, тергөө амалдары уланууда.

Автор: Кылымбек Бейшеев
Фото: Ош ОИИБ