"Тапанча менен коркутуп". Бишкекте каракчылык кылган топ кармалды

Бишкекте каракчылык кылганга шектелип кармалган топто жашы жете электер дагы бар. Бул тууралуу бүгүн, 11-апрелде Биринчи май РИИБинен билдирди.

Маалыматка ылайык, 9-апрелде милицияга А.К аттуу пакистандык арыз менен кайрылган. Ал ошол эле күнү саат 22:30 чамасында Логвиненко көчөсүнөн белгисиз адамдар тапанча менен коркутуп, 20 миң сомдук iPhone 12 үлгүсүндөгү телефонун жана банк карталарын тартып алышканын айткан.

Бул факты боюнча Кылмыш-жаза кодексинин 207-беренесине (Каракчылык) ылайык кылмыш иши козголгон.

Шектүү катары 1992-жылы туулган С.И., 2008-жылы туулган Б.А. жана 2006-жылы туулган А.Д. кармалып, убактылуу кармоочу жайга киргизилген.

Текшерүү учурунда алардан уюлдук телефон жана белгисиз үлгүдөгү тапанча табылып, далил катары кылмыш ишине тиркелген.

Учурда тергөө иштери уланууда.

Автор: Кылымбек Бейшеев
Фото: Биринчи май РИИБ