Бишкекте Улуу Ата Мекендик согуштун ардагерлери эскерилди (сүрөттөр)

Бүгүн, 9-майда Бишкек шаарында Өчпөс оттун жанындагы Жеңиш аянтында Улуу Ата Мекендик согуштагы Жеңиш күнүнүн 79 жылдыгына арналган митинг-реквием өттү. Бул тууралуу Коргоо министрлигинен кабарлады.

Маалыматка караганда, ардагерлерди эскерүү иш-чарасы Өчпөс отко гүлчамбар жана гүлдөрдү коюу, бир мүнөт унчукпай туруу жана өлкөнүн гимнин ырдоо менен башталды.

Митинг-реквиемге жогорку кеңештин төрагасы Нурланбек Шакиев, мамлекеттик катчысы Сүйүнбек Касманбетов, коргоо министри генерал-лейтенант Бактыбек Бекболотов, шаардык мэриянын жетекчилери, Улуу Ата Мекендик согуштун жана тылдын ардагерлери, Бишкек гарнизонунун жоокерлери, жаштар, мектеп окуучулары, өсүп келе жаткан муундар, коомчулуктун өкүлдөрү жана борбор калаанын коноктору катышты.

Салтанатта мамлекет башчынын куттуктоосун катчы Сүйүнбек Касмамбетов окуп берди.

Андан соң шаар тургундары жана коноктору үчүн курал-жарактардын жана аскердик техниканын, ошондой эле "Аскер боткосу" көргөзмөсү уюштурулуп, майрамдык концерт тартууланды.

"Иш-чара Бишкек гарнизонунун салтанаттуу жүрүшү менен жыйынтыкталды", - дешти министрликтен.

Автор: Арууке Амирдинова