Бишкекте Ford Focus унаасын айдай качкан жаран Чүйдөн кармалды

Бишкекте унааны мыйзамсыз айдап качууга шектелген жаран Чүйдөн кармалды. Бул тууралуу Биринчи май РИИБинен билдирди.

Маалыматка ылайык, 14-майда милицияга А.А. аттуу жаран арыз менен кайрылган. Ал ошол эле күнү Бөкөнбаев көчөсүндө токтоп турган Ford Focus үлгүсүндөгү унаасын белгисиз адам айдап кеткенин айткан.

Бул факты боюнча Кылмыш-жаза кодексинин 211-беренеси (Автомототранспорт каражаттарын айдап качуу) менен кылмыш иши козголгон.

Шектүү катары мурда бир нече жолу соттолгон, 1988-жылы туулган К.И. аттуу жаран Чүй облусунан кармалып, тергөөгө жеткирилген. Ал эми уурдалган унаа айып короого токтотулган.

Учурда тергөө иштери уланууда.

Автор: Кылымбек Бейшеев
Фото: Биринчи май РИИБ