Ысык-Көлдө тургундун үйүнөн курал-жарак табылды

Ысык-Көлдө тургундун үйүнөн мыйзамсыз сакталган курал-жарак табылды. Бул тууралуу облустук милиция билдирди.

Маалыматка ылайык, милицияга Семёновка айылынын тургуну үйүндө мыйзамсыз ок атуучу курал сактап жүргөнү тууралуу маалымат түшкөн.

Бул факты боюнча Кылмыш-жаза кодексинин 267-беренесинин (Курал-жарак, ок-дарыларды мыйзамсыз жүгүртүү) негизинде кылмыш иши козголуп, шектүү катары 1984-жылы туулган Ш.А. аттуу жаран аныкталган.

"Ысык-Көл райондук сотунун уруксаты менен шектүүнүн жашаган жерине тинтүү жүргүзүлгөн. Тинтүүдө оптикалык прицели бар ТОЗ-12 сайлуу ок атуучу курал, 16 жана 32 калибрдеги сайсыз ок атуучу куралдар, 125 даана 5,6 миллиметр калибрдеги сайлуу ок-дарылар жана 26 сайсыз ок-дарылар, ошондой эле күкүрт жана бытыра салынган 2 даана идиш табылып, далил зат катары алынган", - деп айтылат маалыматта.

Милиция табылган куралдарга соттук-баллистикалык экспертиза дайындалып, тергөө амалдары жүрүп жатканын кошумчалады.

Автор: Кылымбек Бейшеев
Фото: Ысык-Көл ОИИБ