Ошто "Алтын маньяк" 3 адам менен чогуу кармалды

Өзгөндө уюшкан кылмыштуу топтун мүчөсү жана анын жакындары кармалды. Бул тууралуу Ош ОИИБинен билдирди.

Маалыматка ылайык, 20-майда криминалдык чөйрөдө "Алтын маньяк" каймана аты менен таанымал уюшкан кылмыштуу топтун мүчөсү, мурда соттолгон 1977-жылы туулган Т.А. жана Өзгөн районунун тургундары 1996-жылы туулган Н.уулу А., 1986-жылы туулган М.Т. жана О.Б. кармалган. О.Б мурда "Адам уурдоо" беренеси боюнча жоопко тартылган.

"Алар 9-май күнү Куршаб айыл аймагынын жашоочулары 1995-жылы туулган Б.З. жана 1997-жылы туулган Б.уулу З.ны үйүнөн чакырышып, мурда болгон мамилелерди чечүү максатында катуу ур-токмокко алышып, денелерине жараат келтиришип, чала жан кылып, каналга таштап кетишкен. Ал эми жабырлануучулар денесинен оор жаракат алып, аймактык ооруканага кайрылышкан", - деп айтылат маалыматта.

Топтолгон материалдын негизинде жана дайындалган экспертизанын корутундусуна ылайык, Кылмыш-жаза кодексинин 130-беренеси (Ден соолукка оор залал келтирүү) менен кылмыш иши козголгон.

Милиция аталган жарандарды кармоо УКМК менен биргеликте ишке ашканын кошумчалады.

Автор: Кылымбек Бейшеев
Фото: Ош ОИИБ