Кара-Балтанын тургуну аялын кызганып чыр чыгарган кошунасын атып салды

Кара-Балта шаарынын 39 жаштагы тургуну кошунасын өлтүрүүгө шектелип кармалды. Бул тууралуу бүгүн, 7-июнда Чүй облустук милициясынан билдирди.

Маалыматка ылайык, окуя 6-июнда саат 19:30 чамасында болгон. Шектүү үйүндө эки аял менен спирт ичимдиктерин ичип отурганда аялдардын бири менен чогуу жашаган киши келип, кызганычтан улам ортодо уруш чыккан. Жаңжал ырбап 39 жаштагы үй ээси урушка кеткен жаранды ИЖ-17 үлгүсүндөгү сайсыз ок атуучу куралы менен көкүрөккө аткан. Натыйжада октон жараат алган жаран "Тез жардам" келгенге чейин каза болуп калган.

Аталган факты боюнча Кылмыш-жаза кодексинин 122-беренесине (Адам өлтүрүү) ылайык кылмыш иши козголгон.

Шектүү катары 1985-жылы туулган И.М. аттуу жаран кармалып, убактылуу кармоочу жайга киргизилген.

"Тергөөнүн жүрүшүндө курал алынып, иш боюнча бардык зарыл болгон соттук-медициналык экспертизалар дайындалды. Учурда тергөө амалдары уланууда", - деп айтылат маалыматта.

Автор: Кылымбек Бейшеев
Фото: Чүй ОИИБ