Баткен өрүгү эми Кытайга экспорттолот

Кыргызстандан Кытайга өрүк экспортоо боюнча келишимге кол коюлду. Бул туурасында бүгүн, 19-июнда Айыл чарба министрлигинин маалымат кызматы кабарлады.

Маалымдалгандай, Суу ресурстары, айыл чарба жана кайра иштетүү өнөр жайы министринин орун басары Мирбек Дүйшеев, “Tianhuan ECO International Economy & Trade Nanjing Co. Ltd” компаниясынын башкы директору Чу Цюши жана “Агро Баткен” ЖЧКсынын башкы директору Жалалидин Шакировдун жолушуусу өткөн. Анда Кыргызстандан Кытайга дарбыз жана бакча-жемиш продукцияларын экспорттоо боюнча кызматташуунун келечеги жана мүмкүнчүлүктөрү талкууланды.

“Тараптар өз ара пайдалуу өнөктөштүктү кеңейтүү жолдорун карап чыгып, экспорт көлөмүн көбөйтүү жана кыргыз-кытай ишканаларынын бизнес байланыштарын бекемдөө боюнча конкреттүү кадамдарды талкуулашты. Жолугушууда продукциянын сапатын камсыз кылуу жана бардык зарыл эл аралык стандарттарды сактоо маселелерине өзгөчө көңүл бурулду”, - деп айтылат маалыматта.

Анын алкагында “Tianhuan ECO International Economy & Trade Nanjing Co. Ltd” компаниясы менен “Агро Баткен” ЖЧКсынын ортосунда Кытайга ири көлөмдө өрүк жеткирүү боюнча келишимге кол коюлду. Бул айыл чарба тармагында эки тараптуу кызматташуунун жогорку потенциалын көрсөтөт.

Автор: Замира Ниязбекова