Аксыда жайлоодон уйларды уурдап кеткен шектүү Бишкектен кармалды

Жалал-Абаддын Аксы районунда жайыттан уй уурдаган шектүү кармалды. Бул тууралуу Ички иштер министрлигинен билдирди.

Маалыматка ылайык, апрель айынын ортосунда Торук айылынын тургуну милицияга арыз менен кайрылган. Жабырлануучу Кызыл-Алма айылындагы жайлоодон малын белгисиз адамдар уурдап кетишкенин билдирген.

Бул факты боюнча Кылмыш-жаза кодексинин 205-1-беренеси (Мал уурдоо) менен кылмыш иши козголгон.

Ыкчам издөө иш-чараларынын алкагында, шектүү Аксы районунун 1972-жылы туулган тургуну А.З. экени аныкталып, ал Бишкектен кармалган.

Анын Аксы районунун аймагында жасалган дагы төрт мал уурдоо фактысына тиешеси бар экени аныкталды. Учурда тергөө иштери уланууда.

ИИМ тараткан маалыматта, шектүүнүн канча баш уй уурдаганы айтылган эмес.

Автор: Бек Оморбеков
Фото: ИИМ