Кыргызстандык эки балбан Азия чемпиондугунда алтын медаль алды

Кыргызстандын эркин күрөш боюнча (U23) балбандары Билол Шарип уулу жана Орозобек Токтомамбетов Амман шаарында (Иордания) өткөн Азия чемпиондугунун жеңүүчүлөрү аталды. Бул тууралуу кечээ, 30-июнда Дене тарбия жана спорт департаментинен билдиришти.

Билол Шарип уулу 65 килограмм салмак чен бирдигинде биринчи кармашында индиялык Рохит аттуу балбанган 5:8 эсебинде жеңилип калган. Андан кийинки кармашта 12:0 ири эсебинде монголиялык Турбаяр Даваняманы утту. Ал эми жарым финалда коңшу казакстандык Бекзат Ермекбайды 10:0 эсебинде артта калтырды. Ал финалда кайрадан индиялык Рохит аттуу балбанга кез келип, жыйынтыгында 6:0 эсебинде утуп, Азия чемпиондугунун жеңүүчүсү аталды.

Ал эми балбан Орозобек Токтомамбетов 74 килограммга чейинки салмакта биринчи беттешинде өзбекстандык Зафарбек Отахоновду 6:3 эсебинде артта калтырса, кийинки кармашында казакстандык Женгиз Каныбековду 6:2 эсебинде жеңди. Ал эми жарым финалда монголиялык Батбаяр Бацухду 11:0 ири эсебинде жеңип финалга чыккан. Анда индиялык Джейдип аттуу спортчуну жеңип 23-жашка чейинкилер арасында үчүнчү ирет Азия чемпиону болду.

Мындан тышкары эркин күрөш боюнча Юхан Доктурбек уулу 61 килограммга чейинки салмак чен бирдигинде коло байгеге татыды.