Кара-Кулжадагы селден үч адам каза болду

Ош облусунун Кара-Кулжа районундагы селден үч адам каза болуп, бирөө изделүүдө. Бул тууралуу Өзгөчө кырдаалдар министрлигинин басма сөз кызматы билдирди.

Маалыматка ылайык, кечээ, 30-июнь күнү Кара-Кулжа районунун Кара-Гуз айылында катуу жааган жамгырдан Жетим-Дөбө айылынын Абышка-Оозу тилкесинде саат 22:15 чамасында сел жүрүп, "Дэу Матиз" үлгүсүндөгү унааны агызып кеткен.

Ичиндеги 5 жарандын бирөөсүн жергиликтүү жарандар куткарып калып, калгандарын сел алып кеткен. Учурда куткаруучулар тарабынан 3 жарандын жансыз денеси табылып, бирөөсү изделип жатканы кабарланат.

Жерине ӨКМден 50 куткаруучу, ИИМден 40 кызматкер, "Тез жардам" кызматынан жана жергиликтүү тургундардан 300дөй адам издөө иштерин улантууда.

Автор: Каныкей Амантаева