Абшыр-Ата жолундагы сел алып кеткен көпүрө калыбына келтирилүүдө (видео)

Ноокатта сел кесепетинен ураган Абшыр-Ата жолундагы көпүрө калыбына келтирилүүдө. Бул тууралуу бүгүн, 1-июлда ӨКМден билдиришти.

Маалым болгондой, Ноокат районунун Кулатов айыл аймагында 30-июнь күнү, Көк-Жар–Абшыр-Ата унаа жолунун 8-чакырымындагы көпүрө селден улам жараксыз абалга келген. Натыйжада Кулатов жана Көк-Жар айыл аймактарынын ортосундагы жол каттамы үзгүлтүккө учураган.

Ага ылайык, 37-Жол тейлөө ишканасынын карамагында турган Абшыр-Ата жолундагы Шаран-Сай көпүрөсүндө учурда ӨКМ тарабынан калыбына келтирүү жумушу жүрүүдө.

"Жеринде ӨКМден жалпы 5 инженердик техника тартылган. Көпүрөнү калыбына келтирүү бүгүн кечке чейин бүтөрү күтүлүүдө", - деп айтылат маалыматта.