Ысык-Көлдө селге кабылган чет элдик жарандарга жардам берилди

Ысык-Көлдө селге кабылган чет элдик жарандарга куткаруучулар жардам беришти. Бул тууралуу Өзгөчө кырдаалдар министрлигинен билдиришти.

Кечээ, 1-июлда түнкү саат 23:30 чамасында жааган жаандын кесепетинен Болот Мамбетов айыл аймагына караштуу Ак-Сай тилкесинде сел жүргөн.

Көлгө түшүп, жээкте чатыр менен түнөп калышкан орусиялыктар селге кабылганы айтылат.

"Сел 11 туристтин кийим-кечесин, буюмдарын агызган. Аларга ӨКМдин Тоң району боюнча Өзгөчө кырдаалдар бөлүмүнөн куткаруучулардын ыкчам тобу жардам беришти. Туристтерди сел жүргөн аймактан Бөкөнбаев айылындагы жатаканалардын бирине жайгаштырышкан", - деп жазылат анда.

Эс алуучулардын арасында жабыркагандар жок экени кабарланат.