Жалал-Абадда 39 чакырым аба чубалгысы жаңыланды

Жалал-Абад облусундагы Көк-Арт райондук электр тармактар ишканасында 34 трансформатор оңдоп-түзөөдөн өтүп, 39 чакырым аба чубалгысы жаңыланды. Бул тууралуу бүгүн, 15-июлда Энергетика министрлигинен билдиришти.

Ага ылйык, Жалал-Абад электр тармактар ишканасынын Көк-Арт РЭТинде 350 трансформатор болсо, анын 60ы быйылкы жылга оңдоп-түзөөгө пландалган. Учурда 34ү бүткөрүлдү.

"Утурумдук оңдоп-түзөө жумуштарына 274 трансформатор мерчемделип, анын 191и ондолуп бүттү. Ал эми 0,4-6-10 кВт чыңалуудагы аба чубалгыларында 84 чакырым мерчемделсе, анын 39 чакырымы ондоп-түзөөдөн өтүп, калган 45 чакырымы күз-кыш айларына чейин оңдолот.

Мындан сырткары Көк-Арт райондук электр тармактары күз-кыш айларына чейин 700 даана мамыча орнотот. Алардын 250 даанасы жаңы курулса, 450 даана эскилиги жеткен жыгач мамычалар. Алар темир бетон мамычаларга алмашат. Кызматкерлер пландалган жумуштун негизинде 6 ай ичинде 137 даана мамыча алмаштырышты", - деп жазылат анда.

Көк-Арт РЭТинде 9 көмөк чордонунан чыккан 31 фидер бар. Мында жалпысынан 17 миң 500дөн жогору абонентти 115 кызматкер электр энергиясын үзгүлтүксүз жеткирүүдө кызмат кылары айтылат.

Автор: Каныкей Амантаева
Фото: Энергетика министрлигинин басма сөз кызматы