"Кылмыш жоопкерчилигине тартам деп коркутуп..." Чүйдө опузалап пара алган тергөөчү кармалды

Чүйдө Аламүдүн РИИБинин тергөөчүсү опузалап пара алууга шектелип кармалды. Бул тууралуу бүгүн, 18-июлда Ички иштер министрлигинен кабарлашты.

Маалыматка ылайык, Ички иликтөө кызматына бир жаран арыз менен кайрылып, Аламүдүн РИИБинин кээ бир кызматкерлерине карата чара көрүүнү өтүнгөн. Жабырлануучу алар 11-июлда саат 18:00 чамасында башкармалыктын имаратында уурулук фактысы үчүн кылмыш жоопкерчилигине тартууну айтып коркутуп, кылмыш ишин токтотууга 50 миң сом талап кылышканын айткан.

Бул факты боюнча Кылмыш-жаза кодексинин 343-беренесинин (Опузалап пара алуу) 1-бөлүгү менен кылмыш иши козголгон.

17-июлда болжол менен саат 18:10до райондук бөлүмдүн иш бөлмөсүндө 30 миң сомду алгандан кийин 1996-жылы туулган Э.М. аттуу тергөөчү кармалган. Аны тинтүү учурунда чөнтөгүнөн мурда белгиленген 30 миң сом табылып алынып, убактылуу кармоочу жайына киргизилген.

Учурда тергөө амалдары жүрүүдө.

Автор: Каныкей Амантаева
Фото: ИИМдин басма сөз кызматы