Эмгек министрлиги: Алайда 30 памирлик кыргыз кесиптик билимге ээ болду

Алай районунда 30 памирлик кыргыз кесиптик билимге ээ болду, анын ичинен 15 аял тигүүчүлүктү, ал эми 15 эркек айдоочулук кесипти үйрөнүштү. Бул тууралуу бүгүн, 19-июлда Эмгек, социалдык камсыздоо жана миграция министрлигинен билдиришти.

Маалым болгондой, кечээ эмгек министринин орун басары Бакыт Дарманкул уулу Алай районунун Талды-Суу айылында жашаган памирлик кыргыздардан кабар алды.

Анын айтымында, 15 аял тигүүчүлүк, 15 эркек айдоочулук кесипке окушту.

"Мамлекет ар бир үй-бүлөгө бирден саан уй жана жылкы, 10 баштан кой берди. Райондук социалдык камсыздоо бөлүмүнүн маалыматы боюнча, 16 жашка чейинки 36 бала “үй-бүлөгө көмөк” жөлөкпулун алат.

Мындан тышкары ишке орноштуруу кызматы үй-бүлө мүчөлөрүнө кесиптик окуудан өтүүгө жардам берди: 15 аял тигүүчүлүктү, 15 эркек айдоочулук кесипке окушту", - деди Бакыт Дарманкул уулу.