Акыйкатчы өлкөдө зомбулукка кабылган аялдардын саны өсүп жатканын айтты

Акыйкатчы Жамиля Жаманбаева Кыргызстанда үй-бүлөлүк зомбулуктан улам кризистик борборлорго кайрылган аялдардын саны өсүп жатканын айтты. Бул тууралуу ал Бишкекте өткөн италиялык сүрөтчү Луиза Пильоненин зомбулукка кабылган аялдарга арналган жеке көргөзмөсүндө билдирди.

Анда акыйкатчы кыз-келиндердин көйгөйлөрүн ачык айтып, өз укуктарын коргоого чакырды.

"Жыл сайын аялдарга болгон зомбулук күч алып жатат. ИИМдин маалыматы боюнча, былтыр 13 миң 104 аял зомбулукка кабылса, 2022-жылы мындай 8225 учур катталган. Бул сан мындан да көп болушу толук ыктымал. Анткени бизде “эл эмне дейт?” деген стереотип бар да. Калыптанып калган көрүнүштү жок кылып, зомбулукту жашырбаш керек", - деди Жаманбаева.

Ошондой эле акыйкатчы зомбулукка кабылган аялдар укуктук, психологиялык жана юридикалык жактан жардам алуу үчүн 115 тынымсыз байланыш номерине кайрылса боло тургандыгын кошумчалады.

Автор: Айпери Бакталбек кызы
Фото: Акыйкатчы институту