Өлкөдө чогултулган Meken ноутбуктарынын баасы канча экени белгилүү болду

Өлкөдө чогултулуп жаткан Meken брендиндеги ноутбуктар 35 миң сомдон сатылат. Бул тууралуу "Кыргыз электрониканын" төрагасы Илья Черный Economist.kg басылмасына курган маегинде билдирди.

Анын айтымында, ири буйрутма бергендер үчүн 5 миң сомго чейин арзандатуулар болот. Ошондой эле ал Билим берүү министрлиги үчүн баа кыйла арзан болорун белгиледи.

"Азырынча экспортко суроо-талап жок. Биз алгач өлкө рыногуна иштейбиз. Эгерде суроо-талап болсо, албетте, экспорттойбуз", - деген ишкана жетекчиси.

Мындан тышкары Илья Черный Meken деген аталыш жарандардын патриоттук сезимин ойготуу максатында коюлганын кошумчалады.

Ноутбуктар 12-муундагы Intel Core i5 процессору, 8 ГБ оперативдик эс-тутум, 256 ГБ катуу диск, 14-дюймдук экран жана көлөмү 5000 мАс батарея менен жабдылган.

Эске салсак, буга чейин "Кыргыз индустрия" ачык акционердик коомунун алдындагы "Кыргыз электроника" ишканасы ноутбуктарды чогулта баштаганы белгилүү болгон.

Автор: Кылымбек Бейшеев
Фото: “Кыргызиндустрия” ачык акционердик коому