Милиция Маевка айылынын астындагы жерди мыйзамсыз басып алган кишини кармады

Чүй облусунуна караштуу Маевка айылындагы айыл чарба жерлерине мыйзамсыз курулуш жүргүзгөн деп шектелип бир жаран кармалды. Бул тууралуу бүгүн, 31-июлда облустук милиция билдирди.

Маалыматка ылайык, 7-майда милицияга муниципалдык башкармалыктын башчысы арыз менен кайрылган. Ал айылдын №396 контурунда жайгашкан сугат жерлерди белгисиз бирөөлөр мыйзамсыз ээлеп алышып, ал жерге турак жайларды куруп жатышканын айткан.

Бул факты боюнча Кылмыш-жаза кодексинин 212-беренесинин (Бөтөн жер участогун өзүм билемдик менен ээлеп алуу жана максаттуу багытын бузуу менен айыл чарба багытындагы жерлерге өзүм билемдик менен курулуш куруу) негизинде кылмыш иши козголгон.

Шектүү катары 1987-жылы туулган К.А. аттуу жаран кармалып, убактылуу кармоочу жайга киргизилген.

Учурда тергөө иштери уланууда.