Баткен эли жалгыз бой энеге үй куруп берди (сүрөт)

Баткен районунун Чоң-Талаа айылында турмуш шарты оор, үч балалуу жалгыз бой энеге элдин салымы менен үй курулду. Бул тууралуу бүгүн, 2-августта президенттин Баткен облусундагы өкүлчүлгүнүнөн билдирди.

Маалыматка ылайык, "Жакшылык чөйрөсү" коомдук кайрымдуулук фонду тарабынан башталган демилге, бир жарым ай аралыгында бүткөрүлдү. Үч бөлмөлүү үй жашоо үчүн керектүү бардык шарттары менен курулган.

Турак үйдү ээлерине тапшыруу аземине президентинин Баткен облусундагы ыйгарым укуктуу өкүлү Абдикарим Алимбаев, Ички иштер министринин биринчи орун басары Нурбек Абдиев, жергиликтүү жетекчилер жана айыл тургундары катышты.

Облус башчысы бул саамалыкка салым кошкон ар бир жаранга ыраазычылык билдирип, көпчүлүктүн башын бириктирип, муктаждардын көйгөйүн жеңилдеткен "Жакшылык чөйрөсү" кайрымдуулук фондунун жетекчиси Аида Заиновага Ардак грамота тапшырды.

Ал эми үй ээсине акчалай белегин берди. Ошондой эле аталган фонд тарабынан башталган экинчи үйдүн курулушуна өз салымын кошту.

"Ден соолугунан жабыркаган эне жолдошу каза болгон соң үч баласы менен турак жайы жок, турмуштун оор кырдаалына кабылган. Анын муктаждыгын жеңилдетүүнү колго алган фонд бир жарым ай аралыгында бир жарым миллион сом каражат топтогон. Жакшылыкка катардагы эл, жергиликтүү ишкерлер жана 1989-1998-жылы туулган облустун жигиттери өзгөчө салым кошкон. Үй ээси Күмүшай Назарованын баласы да алгач иштеп тапкан каражатын курулушка жумшаган", - деп айтылат маалыматта.

Үй куруу үчүн Төрт-Гүл айыл өкмөтү 12 сотых жер тилкесин бөлүп берген.

Автор: Бек Оморбеков