Чаткалда кол өнөрчүлөрдүн фестивалы өтөт

10-11-август күндөрү Жалал-Абад облусунун Чаткал районунда “Өзгөчө Чаткал шырыгы жана кырк курак – 2024” аталышындагы фестиваль өтөт. Бул тууралуу Маданият, маалымат, спорт жана жаштар саясаты министрлигинен кабарлады.

Маалыматка ылайык, кароо-сынакка өлкөнүн бардык аймактарынан кол өнөрчүлөр, көркөм өнөр буюмдарын өндүрүү менен алектенген жеке ишкерлер жана маданият кызматкерлери катыша алат.

"Аймактардан келген уз-чеберлер атайын белгиленген жерге буюмдарын жайгаштырат. Ар бир катышуучу өздөрүнүн алып келген эмгектери туурасында 5 мүнөттүн ичинде айтып берүүсү зарыл. Катышуучулардын бардыгы улуттук кийимде болуусу шарт. Калыстар тарабынан кол өнөрчүлөргө суроолор берилиши мүмкүн", - деп жазылат анда.

Фестивалдын максаты – кыргыз элинин улуттук баалуулуктарын, маданий мурастарын сактоо жана жайылтуу экени айтылат.

Автор: Каныкей Амантаева
Фото: Каныкей Амантаева