"Ай-буйга келтирбей". УКМК Эркин Мамбеталиевди кармаган видеосун жарыялады

УКМК мурдагы президент Алмазбек Атамбаевдин мурунку жансакчысы Эркин Мамбеталиевдин кармалышы боюнча маалымат берди.

Атайын кызматтын маалыматына караганда, Мамбеталиевдин кримтөбөл Рысбек Акматбаевге жана Камчы Колбаевдин тобуна тиешеси болгон.

"Ал криминалдык чөйрөсүндөгү байланыштарын колдонуп, узак убакыт бою кылмыштуу кирешелерди адалдап, көп сандаган кыймылдуу жана кыймылсыз мүлктөрдү, батир, жер тилкелерди, коммерциялык объекттерди, кымбат баалуу унааларды жакын туугандарына каттаган жана алардын көпчүлүгүнүн эч кандай уруксат берүүчү документтери жок болгон", - деп айтылат маалыматта.

УКМК анын ок атуучу бардык куралдары алынып, 4 миллион доллардан ашык мыйзамсыз жол менен табылган мүлкү аныкталганын билдирди.

Учурда Эркин Мамбеталиев Кылмыш-жаза кодексинин 261-беренеси (Уюшкан топко катышуу) боюнча Каракол шаардык ички иштер башкармалыгынын тергөө абагына киргизилди.

Тергөө иштери жүрүп жатат.

Белгилей кетсек, 8-августта Эркин Мамбеталиев Бишкекте УКМК тарабынан кармалганы кабарланган.