Париждеги Олимпиададан байгелүү кайткан спортчуларга канча сый акы берилет?

Париж шаарында өткөн XXXIII Жайкы Олимпиада оюндарынан күмүш байге алган кыргызстандык спортчуларга 10 миллион сом берилет. Бул тууралуу маалыматты, бүгүн, 13-августта Министрлер кабинетинен тастыктады.

Маалым болгондой, кыргыз өкмөтү тарабынан алтын байге үчүн 15 миллион сом, күмүшкө 10 миллион сом жана коло медаль алгандарга 7 миллион сом берилет.

Ошондой эле машыктыруучуларга жана дарыгерлерге да сый акы каралган.

Буга чейин өкмөттүн басма сөз кызматы мыйзам боюнча Олимп оюндарында алтын алган спортчуларга 10 миллион сом, экинчи орунга 7 миллион жана үчүнчү орун үчүн 5 миллион сом каралганын кабарлаган.

Белгилей кетсек, Олимпиадада өлкө намысын 16 спортчу коргоп, алтоо байгелүү орундарга илинди. Тагыраагы, Мээрим Жуманазарова (кыз-келиндер күрөшү) менен Мунарбек Сейитбек уулу (бокс) күмүш байге утуп алышты. Ал эми Жоламан Шаршенбеков, Акжол Махмудов, Үзүр Жузупбеков (грек-рим күрөшү) жана Айсулуу Тыныбекова (кыз-келиндер күрөшү) коло медаль тагынышты.