Плющенко Орусиянын чемпиондугунда 15 жыл ичинде биринчи ирет жеңилүү ызасын тартты

Орусия спорттун дал ушул түрүнөн алтын медаль утууну максат кылып жатат. Демек, эми Плющенконун ордуна Максим Ковтунга ишеним көбүрөөк артылат.

Орусиялык Евгений Плющенко 1998-жылдан бери биринчи жолу Орусиянын муз үстүндө бийлөө боюнча биринчилигинде жеңилүү ызасын тартты. Бул тууралуу бүгүн, 26-декабрда орусиялык басылмалар билдиришти.

Маалыматка ылайык, муз үстүндө бийлөө боюнча Орусиянын 10 жолку чемпиону 2013-жылы жеңилүү ызасын тартты. Ал Орусиянын биринчилигинде топтогон упайлардын негизинде Максим Ковтунга уттуруп, 2-орунду ээлеп калды. Эми ал “Сочи-2014” Кышкы Олимпиада оюндарында жекеликте эмес, командалык жарыштарга гана түшүүгө укугу бар.

Эске салсак, спортчу Орусиянын чемпиондугун биринчи жолу 1998/1999-жылкы сезонунда уткан. Андан бери Плющенко өзү катышкан бардык биринчиликтерде жеңүүчү аталган. 2006- 2009-жылдар аралыгында ал түрдүү себептерден улам өлкө чемпиондугуна катышкан эмес.

Автор: Максат Кудайбердиев