Бишкекте түндө көчөдөгү адамды бычактаганга шектүү кармалды

Бишкек шаарында денеге оор залал келтирүүгө шектелип 43 жаштагы жаран кармалды. Бул тууралуу бүгүн, 27-сентябрда Ленин РИИБинен билдирди.

Маалыматка ылайык, 26-сентябрь күнү милицияга У.Т. аттуу жаран арыз менен кайрылган. Ал ошол эле күнү саат 21:00 чамасында Сельсоветский менен Ден-Сяопин көчөлөрүнүн кесилишинен белгисиз адамдар менен пикир келишпестиктен мушташа кеткенин, алардын бири бычак менен денесине залал келтирип качып кетишкенин айткан.

Бул факты боюнча Кылмыш-жаза кодексинин 130-беренесинин (Денеге оор залал келтирүү) негизинде кылмыш иши козголуп, тиешелүү экспертизалар дайындалган.

Шектүү катары 1981-жылы туулган О.М. аттуу жаран кармалып, убактылуу кармоочу жайга киргизилген.

Учурда тергөө иштери уланууда.

Автор: Кылымбек Бейшеев
Фото: Ленин РИИБ