Бишкекте Көз карандысыз сертификациялоо жана валидациялоо борбору ачылды

Кечээ, 2-октябрда, Билим берүү жана илим министрлигинин алдындагы Көз карандысыз сертификациялоо жана валидациялоо борбору ачылды. Бул туурасында мекеменин маалымат кызматы билдирди.

Иш-чарага билим берүү жана илим министри Догдуркүл Кендирбаева, Эмгек министринин биринчи орун басары Мухтар Баймурзаев, Азия өнүктүрүү банкынын директору Жэң Ву, Соода-өнөр жай палатасынын президенти Темир Сариев, өнөктөштөр жана лицейлердин директорлору катышты.

Билим берүү жана илим министри Догдуркүл Кендирбаева валидациялоо жана сертификациялоо борбору эч кандай билим албай туруп, өз алдынча кесипти өздөштүрүп алган адамдардын адистигин тастыктап, алардын эмгек рыногунда ордун табышына чоң мүмкүнчүлүк түзөрүн белгиледи.

Бул программанын ишке ашышына жакындан жардам берген негизги өнөктөшү Азия өнүктүрүү банкы. Анын директору Жэң Ву экономиканын өсүшү менен адистерге болгон талап дагы өсүп жатканын белгилеп, бул борбордун ачылышы заман талабына шайкеш келүүдө деди.

“Кесиптик билим берүүнүн сапаты өстү. Программанын алкагында 34 лицей, 7500дөн ашык окуучу окуп, 1500 мугалим чеберчилигин жогорулатты”, – деди директор.

Статистикага ылайык, 2023-жылы Кыргызстанда 2 миллион 700 миң экономикалык жактан активдүү жаран бар болсо, алардын 44%ы гана формалдуу профессионалдык билимге ээ.

Автор: Замира Ниязбекова