497 миллион сомго оңдолуп жаткан Илимдер академиясындагы иштер качан аяктаары айтылды

Бүгүн, 3-октябрда министрлер кабинетинин төрагасы Акылбек Жапаров Бишкек шаарында жайгашкан Улуттук илимдер академиясынын жана М.Миррахимов атындагы Улуттук кардиология жана терапия борборун капиталдык ремонттон өткөрүү иштери менен таанышты. Бул туурасында өкмөттүн маалымат кызматы билдирди.

Маалымдалгандай, Улуттук илимдер академиясына жалпысынан 29 миң чарчы метр имаратты жана сырткы көрүнүшүн жасалгалоо үчүн 497 миллион сом каралган. Ал эми капиталдык ремонттоо иштери ноябрь айынын аягына чейин бүткөрүү пландалган.

Ал эми М.Миррахимов атындагы Улуттук кардиология жана терапия борборунун капиталдык оңдоп-түзөө иштерине жалпысынан 460 миллион сомдон ашуун каражат каралгандыгы кошумчаланган. Ал каражатка Бишкектеги жана Төө-Ашуу белиндеги имараттардын да ремонту кирет.

Акылбек Жапаров капиталдык ремонт иштерин өз убагында жана сапаттуу бүткөрүүнү тапшырды.

Автор: Замира Ниязбекова