Шахмат боюнча жаштар арасындагы Дүйнө чемпиондугунда Чыңгыз Исаев 28-орунду ээледи

28-декабрда Аль-Айн шаарында (БАЭ) шахмат боюнча жаштар арасында жыйынтыкталган Дүйнө чемпиондугунда кыргызстандыктардын ичинен эң жогорку көрсөткүчтү Чыңгыз Исаев көрсөтүп, мелдеште 28-орунду ээледи. Бул тууралуу мелдештин расмий сайты билдирет.

Маалыматка ылайык, мелдештин жыйынтыктоочу 11-тур оюндарында Азиз Дегенбаев, Алтай Алыбаев, Мирлан кызы Азалия (баары 8 жашка чейинкилер арасында), Айбек Исакжанов, Диана Өмүрбекова (14 жашка чейин), Тагир Таалайбеков (16 жашка чейин), Эсенбек уулу Бакай (18 жашка чейин) жеңишке жетишишти.

Кыргызстан курама командасынын курамына кирген 20дан ашык шахматчынын ичинен эң жогорку көрсөткүчтү Чыңгыз Исаев көрсөттү. Ал 14 жашка чейинкилерден мүмкүн болгон 11 упайдан 7 упай топтоп, 28-орунду ээледи.

Андан сырткары Дария Ли (10 жашка чейин) 37-орунду ээлесе, Алымбай кызы Айжан (18 жашка чейин) 53-орунга татыды.

Автор: Максат Кудайбердиев