"Тик учак даяр". Министр Ажикеев Чаткалда жоголгон 6 адам боюнча үн катты

Өзгөчө кырдаалдар министри Бообек Ажикеев Чаткалда кар көчкү алдында калган жарандарды издөө иштери боюнча билдирүү таратты. Бул тууралуу ӨКМ башчысы социалдык тармактагы баракчасы аркылуу билдирди.

Айтымында, 9-октябрда Каныш-Кыя айылынын тургундары жана бир чет элдик жаран жалпы 14 адам эндик өсүмдүгүнүн тамырын издөөгө тоого кеткен бойдон дайынсыз болгон.

"Издөө иштеринин натыйжасында 16-октябрда 8 жаран аман-эсен табылды, калган 6 киши кар көчкүдө калган деген маалымат айтылууда. Учурда катаал шарттарга байланыштуу издөө иштеринде колдонулган техникалар менен иштөө кыйынчылык жаратууда.

Жабыркагандарды табууга тик учак даяр. Аба ырайынын шарттарына байланыштуу азырынча уча элек. Абал жакшырса, дароо жөнөйт. Тик учак менен эки жергиликтүү тургун барат, алар так жерди аныктагандан соң ӨКМдин 6 адамдан турган чалгындоо тобу 2-3 күн ичинде жетип, издөө иштерин баштайт. Бул топ бардык керектүү жабдуулар, спутник аркылуу телефон менен үзгүлтүксүз мага маалымат берип турат. Анын артынан эле экинчи куткаруучу отряд жөнөтүлөт. Экинчи топ 6 ат менен жабдылып, жабыркагандарды эвакуациялайт", - деп жазды министр.

Ошондой эле ал кырдаалды жеке көзөмөлүнө алганын кошумчалады.