Эртең "Ала-Тоо" аянтында эстрада ырчыларынын катышуусунда концерт өтөт

Эртең, 2-ноябрда Бишкектеги "Ала-Тоо" аянтында маданият кызматкерлеринин күнүнө арналган концерт өтөт. Бул туурасында бүгүн, 1-ноябрда Маданият министрлиги билдирди.

Анда маалымдалгандай, концерттик программа саат 18:00дө башталып, ага кыргыз эстрада жылдыздары катышат.

Белгилей кетсек, 1926-жылы 2-ноябрда Кыргызстандын тарыхында алгачкы жолу Молдогазы Токобаевдин "Кайгылуу Какей" аттуу драмасы коюлган. Бул датаны эске алуу менен 1995-жылы 28-июлда Кыргыз өкмөтү маданият ишмерлеринин күнүн 2-ноябрда белгилөө тууралуу №318 токтомун чыгарган.

Кыргыз ССРинин Маданият министрлиги алгач 1953-жылы 15-мартта негизделген. Өлкө эгемендүүлүк алгандан кийин 1991-жылдын январь айынан тарта Кыргыз Республикасынын Маданият министрлиги болуп өзгөргөн.

Автор: Айжанар Рыспек кызы
Фото: Интернеттен алынды