"Чачынан сүйрөп, коркуткан". Бишкекте мурдагы аялын кордогон жаран кармалды (видео)

Бишкек шаарында мурдагы аялына кол көтөрүп, коркуткан деген шек менен 34 жаштагы жаран кармалды. Бул тууралуу бүгүн, 12-ноябрда Ленин райондук ички иштер башкармалыгынан билдирди.

Маалыматка ылайык, милицияга аял киши кайрылган. Ал 11-ноябрь күнү саат 21:00дөр чамасында Тыналиев көчөсүндөгү көп кабаттуу үйлөрдүн балдар аянтчасынан мурдагы күйөөсү күч колдонуп, чачынан сүйрөп, коркутканын айткан.

Бул факты боюнча шектүү делген 34 жаштагы жаран кармалып, ага карата Кылмыш-жаза кодексинин 70-беренесинин (Үй-бүлөлүк зомбулук) негизинде протокол түзүлгөн.

Райондук милиция кармалган жаран учурда убактылуу кармоочу жайга киргизилгенин, тергөө иштери жүрүп жатканын кошумчалады.