"Асман көктө чалкыган, жериң сонун, Ала-Тоо". Карга чулганган Кара-Кой жайлоосу

Кыргызстандын жаратылышы ар мезгилде кооз. Учурда күздүн акыркы айы өкүм сүрүп, айланадагы кооздук баарыбызды кубандырууда. Түрдүү түскө боёлгон бак-дарактар жакшы эмоция тартуулап жаткан кези. Мындайда таланттуу инсандарга эргүү келип, жакшы чыгармалар жаралары да турган кеп.

А бизге жаратылыштын кооздугуна суктанып, жан дүйнөбүздү тынчтандырууга жакшы мүмкүнчүлүк жаралып турат.

Ош облусунун Ноокат районунун Кыргыз-Ата айыл аймагында жайгашкан Кара-Кой эс алуу жайында эс алуучулардын саны өзгөчө жайында арбын. Бирок күз-кыш мезгилинде барып табигатка суктангандар бар.

Жайлоо Ош шаарынан 75 чакырым алыстыкта жайгашкан. Анын жалпы аянты 11 872 гектарды түзүп, 5 айыл аймактын жайыт жерлери менен чектешкен. Мында кара кийик (доңуз), карышкыр, түлкү, кашкулак, кийик, коён сыяктуу жапайы жаныбарлар бар.