ID-паспортту жаңы онлайн-сервис аркылуу кантип алмаштырса болот?

Бүгүн, 5-ноябрдан тарта Санариптик өнүктүрүү министрлиги ID-паспортторду алмаштыруу үчүн жаңы онлайн-сервисти ишке киргизди. Бул туурасында мекеменин маалымат кызматы билдирди.

Маалымдалгандай, эми Tunduk мобилдик тиркемеси аркылуу үйдөн чыкпай эле паспортту жаңыртса болот.

Кимдер пайдалана алат?

Сервис 2017–2024-жылдары чыгарылган ID сериясындагы жаңы үлгүдөгү биометрикалык паспорту бар жарандар үчүн жеткиликтүү. Эгерде сизде эски AN сериясындагы паспорт болсо, анда алмаштыруу үчүн Калкты тейлөө борборлоруна кайрылуу керек болот.

Кантип арыз берүүгө болот?

Tunduk тиркемесин ачып, «ID-картаны алмаштыруу» бөлүмүн тандаңыз;
Алмаштыруу себебин көрсөтүңүз: жоголгон, бузулган, мөөнөтү бүткөн же маалыматтарды жаңылоо;
Тиркеме аркылуу фото-идентификациядан өтүңүз;
Жаңы паспортту ала турган КТБны тандаңыз;
Мамлекеттик төлөмдү онлайн төлөңүз — ыңгайлуу жана тез!

Документтер 1ден 3 күнгө чейин текшерилет. Паспорт даяр болгондо, тиркеме аркылуу кабарлама аласыз.

Жаңы паспортту кантип алса болот?

Кабарлама келгенден кийин, тандаган КТБга барып, оригинал документтериңизди көрсөтүп, жаңы ID-паспортту ала аласыз.

Санариптик өнүктүрүү министрлиги мамлекеттик кызматтарды жарандар үчүн жеткиликтүү жана ыңгайлуу кылуунун үстүндө иш алып барууда.

Автор: Замира Ниязбекова